Bilboko Portuko errepide bidezko salgaien garraioa hobetzeko azpiegitura teknologikoa garatzeko proiektu pilotuan parte hartzeko deialdia ireki da

Bilboko Portuko Agintaritzak parte-hartzaileak hautatzeko prozesua ireki du, Bilboko Portura abiapuntu edo helmuga duten salgaien errepideko garraioa hobetzeko azpiegitura teknologikoa garatzeko proiektu pilotuaren bigarren deialdian.

Proiektu berritzaile honek Bizkaiko Foru Aldundiaren laguntza du, Portuaren ohiko erabiltzaile diren ibilgailu astunen garraiolariei zuzenduta dago, eta haren helburua da Bizkaiko errepideetan garraio adimendunagoa, seguruagoa eta eraginkorragoa lortzea, eta, aldi berean, jasangarritasun-estandarrak igotzea. Bizkaia Connected Corridor (BCC) ekimen publiko-pribatuaren barruan dago, enpresek mugikortasun autonomoko, konektatuko eta kooperatiboko (CCAM) teknologia aitzindariak eta azpiegitura adimendunak probatzeko.

2024an, 680.000 salgai-kamioi inguru sartu ziren Portuan, eta, proiektu horrekin, BCCri lotutako C-ITS zerbitzuen hedapenaren barruan sartuko dira portuko sarbideak. Hala, foru-errepideen sarearen koordinazioa hobetuko da, portuko garraiolariek erabiltzen dituzten eta e-puertobilbao merkataritza elektronikoko plataformak ematen dituen bide-informazioko zerbitzuen bilakaera teknologikoari esker, komunikazioak optimizatzeko eta itsas eta portu-inguruko enpresen arteko interakzioa errazteko.

Bilboko Portuaren plataforma elektronikoa erreferente gisa finkatu da Europako portuen artean, eta, Aldundiarekin lankidetzan egindako proiektu honekin, urrats berriak eman ditu berrikuntza eta automatizazioa sustatzeko, sare ekonomikoaren mesedetan.