Bilboko Portuak bere ateak irekitzen dizkio gazte talentuari

Beste urte batez, Bilboko Portua eta Itsasadarra Fundazioak Enpresan praktikak egiteko programaren deialdia egin du. Ekimen horren helburua da gazteen talentuaren garapena sustatzea, logistikaren eta portuen sektoreak ibilbide profesional bat garatzeko eskaintzen dituen aukerak ezagutaraztea eta, aldi berean, Bilboko Portuaren ibaiertzeko udalerrietako gazteen enplegagarritasuna hobetzen laguntzea.

Ekimen honi esker, 2025/2026 ikasturtean, unibertsitate-ikasketetan edo Goi-mailako Heziketa-zikloetan titulua duten 30 urtetik beherako hamar gaztek, aldez aurretik haien prestakuntzarekin lotutako esperientziarik ez dutenak, praktika profesionaletarako bekarik jaso ez dutenak, lehen esperientzia profesionala izan ahal izango dute Bilboko Portuko Agintaritzaren sailetako arlo funtzionaletan. Programan sartzeko lehentasuna Fundazioaren patronatukide diren itsasertzeko udalerrien batean bizi direnek izango dute.

Zehazki, deialdi berri honetan sail hauetako lanpostuak sartzen dira: Osasuna, Segurtasuna eta Ingurumena; Plangintza, Proiektuak eta Eraikuntza; Eraldaketa Digitala; Giza Baliabideak eta Antolaketa; Komunikazioa; Merkataritza eta Marketina; Sistemak eta Kudeaketa-Kontrola; Idazkaritza Nagusia eta Zerbitzu Juridikoak; eta Bilbao PortLab, Bilboko Portuko berrikuntza-huba.

Programan sartzeko aukera duten titulazioen artean, honako hauek nabarmendu daitezke: Graduak Kimikan, Ingurumenean edo Industria Antolakuntzan; Zibila, Meatzeen eta Energien Teknologia edo Geomatika eta Topografia Ingeniaritzan; Lan Harremanetan, Psikologian, Soziologian, Zuzenbidean, Ekonomia edo Enpresen Administrazioan edo Zuzendaritzan; Kudeaketaren Ingeniaritza Informatikoan edo Ingeniaritza Informatikoan; Publizitatean, Marketinean, Komunikazioan, Dokumentazio-kudeaketan edo Bibliotekonomian; Masterrak Laneko Arriskuen Prebentzioan, Itsas Zuzenbidean edo Kanpo Merkataritzan; edo Asir, Dam edo Daw-eko Goi-mailako Heziketa-zikloa.