Egoera ekonomiko-finantzario onbideratuari esker, proiektu berriak sustatu daitezke, eta portuko tasak bere horretan mantendu

2025ean, Bilboko Portuko Agintaritzaren negozio-zifra 77 milioi eurokoa izan da; 2024an, berriz, 76,7koa. Horrek esan nahi du %+0,37 hazi dela. Europako Inbertsio Bankuarekiko zorra 30,9 milioikoa da, eta diruzaintzako saldoa 73,8 milioikoa. Sortutako baliabideak (EBITDA) 35,2 milioi izan dira.

Aurrekoaren arabera, erakundearen egoera ekonomiko-finantzarioak aukera emango du inbertsio garrantzitsuak bultzatzen jarraitzeko funtsezko gaietan, hala nola trantsizio energetikoan, oinarrizko azpiegituran, intermodalitatean, digitalizazioan, berrikuntzan eta portu-hirian.

Horretarako, 80 milioi eurorainoko mailegu berdea sinatu zen Europako Inbertsio Bankua – Klimaren Bankuarekin, eta Europako Batzordearen programa lehiakorretarako 34 milioi dirulaguntza onartu dira, portuaren elektrifikazioa eta eredu energetikoaren sorrera, deskarbonizazioa eta berrikuntza bultzatzeko. Inplementazio-fasean dauden proiektu horiek abiapuntu bikaina dira jauzi kualitatibo bat egiteko eta Europako Batzordeak laster argitaratuko duen “Europako Portuetarako Plan Estrategiko integrala”-ren abangoardian jartzeko.

Halaber, enpresen lehiakortasunari laguntzeko, Bilboko Portuko Agintaritzak bezeroei aplikatutako prezioak berrikusi gabe jarraituko du. Beraz, 2014-2025 aldian gertatu den bezala, portu-tasak aldatu gabe mantenduko dira, aldi horretan metatutako inflazio orokorra gorabehera.

Halaber, Portuko Agintaritzak pizgarriak eskaintzen ditu, itsasontziaren tasan %50eko deskontuarekin, propultsiorako erregai alternatiboak (GNL eta ontzi hibridoak) edo portuan emisio gutxiko teknologiak erabiliz deskarbonizazioa bultzatzen duten ontzi aitzindariei.