Porturako sarbideaBilboko Portuko Agintaritzak eta Nouvelle-Aquitaineko Portu Komertzialen Partzuergoak – Baiona, Bordele, Rochefort-Tonnay-Charente eta Arroxela portuek osatua – Lankidetza-hitzarmen bat sinatu dute, Agri Vrac azokaren esparruan, mugaz gaindiko harremanak sendotzeko, elkarlan estrategikoa eta koordinatua sustatuz hainbat arlotan, hala nola irtenbide berritzaile eta jasangarrien garapenean eta, bereziki, itsasoko haize-energiaren garapena Atlantikoko kostan.
Hitzarmen horren bidez, bi erakundeek beren hinterlandaren zerbitzura dauden merkataritza-portuen lehiakortasuna orokorrean hobetzen laguntzeko asmoa adierazten dute, mugaz gaindiko arku logistiko eraginkor eta jasangarri bat sortuz, portuen arteko konektibitatea indartuz, eta dauden azpiegiturak aprobetxatuz Frantziako hego-mendebaldeko eta Espainiako iparraldeko arku atlantikoan dauden eragile ekonomiko guztiei portu-zerbitzu eragingarriagoa eta integratuagoa eskaintzeko, denbora errealean datu-trukeak garatzeko aukerarekin.
Halaber, bi aldeek hitzematen dute ekimen komunak sustatuko dituztela arlo hauetan: jasangarritasuna, digitalizazioa, berrikuntza logistikoa eta itsas energia berriztagarrien inplementazioa; besteak beste, teknologia berdeen garapena, Europako hego-mendebaldeko hornidura-kateen optimizazioa eta portu-jardueren karbono-aztarnaren murrizketa. Ekimen horien asmoa da Europako portu liderrak izatea itsas garraio jasangarrian eta irtenbide eko-arduratsuen sustapenean.
Nazioarteko merkatuei erantzuteko esportazio- eta inportazio-ahalmena handitzea aurreikusten du aliantzak, inportazio- eta esportazio-fluxuak erraztuz; horrek merkataritza bultzatuko du, eta hinterlandaren ekonomia suspertuko du, aldi berean Europako eskualdearen ahalmen logistikoa optimizatuz.
Agri Vrac
Baionako Portuak antolatutako nekazaritzako elikagaien industriaren azokak Angeluko Espace de l’Oceanen bildu ditu zerealen, ongarrien eta animalia-nutrizioaren sektoreko eta haren hornikuntza-kateko enpresak eta profesionalak, bai Frantziako hego-mendebaldekoak, bai Espainiako iparraldekoak.
Topaketan, hainbat gairi buruzko hitzaldiak izan dira, hala nola Frantziaren eta Espainiaren arteko lotura logistikoak; multimodalitatea, deskarbonizazio industriala eta logistikoa; eta nekazaritzako elikagaien logistika jasangarria, eraginkorra eta mugaz gaindikoa izateko aukerak. Halaber, Agri Vracek plataforma gisa balio izan du solteko elikaduraren logistikako profesionalak eskualdeko nekazaritzako elikagaien industriarekin konektatzeko, besteak beste, zerbitzu- eta ekipo-hornitzaileak, portuko operadoreak eta kontsignatarioak.
