Porturako sarbideaJaponiako Behe Ganberako -herrialde asiarreko organo legegilea- ordezkaritza batek Bilboko Portuko instalazioak bisitatu ditu, bi aldeen arteko merkataritza-harremanak estutzeko. Bilboko Portuko Agintaritzak Getxon duen Olatua gurutzaontzi-terminalean egin da topaketa, eta han izan dira Japoniako Ordezkarien Ganberako diputatuak, hala nola Lurralde, Azpiegitura, Garraio eta Turismo Batzordeko zuzendariak, Takashi Kii eta Hiroyuki Moriyama, eta Lurralde, Azpiegitura, Garraio eta Turismo Batzordeko kidea, Kiichiro Hatoyama, Ordezkarien Ganberako Idazkaritzako funtzionarioek lagunduta.
Bilboko Portuko Agintaritzako Eragiketetako, Arlo Komertzialeko eta Logistikako zuzendari Andima Ormaetxek egin die harrera japoniarrei, eta han izan dira Japoniak Espainian duen Enbaxadako ministroa (Bigarren Buruzagitza) eta kontseilaria, Shinji Minami eta Mai Sasaki, hurrenez hurren.
Japoniako ordezkaritzak interes berezia agertu du jarduera logistikoaren karbono-aztarna murrizteko Bilboko Portua aurrera eramaten ari den jardueretan, hala nola itsas korridore berdeak eta digitalak garatzea; Amsterdamgo eta Duisburgeko portuekin hitzarmenak sinatzea Euskal Autonomia Erkidegoaren eta Europako erdialdearen artean hidrogeno berriztagarriko korridore bat ezartzeko; edo BilbOPS proiektua, kontainerren, ferryen, ro-pax trafikoen eta gurutzaontzien terminalak OPS teknologiarekin elektrifikatzeko.
Proiektu honen zati bat ‘Europa konektatzen’ (CEF funtsak) mekanismoak finantzatzen du, eta gainerakoa Bilboko Portuko Agintaritzaren funts propioek. Aipatzekoa da Europako Inbertsio Bankuarekin (EIB) 80 milioiko mailegua sinatu dela, eta horren zati bat proiektu horren finantzaketarako erabiliko dela. 2027an martxan jartzen denetik aurrera, itsasontziek motor osagarriak itzali ahal izango dituzte portuan dauden bitartean, eta partzialki iturri berriztagarrietatik sortutako energia erabili ahal izango dute, hala nola plaka fotovoltaikoak. Horri esker, berotegi-efektuko gasen emisioak gutxitu ahal izango dira, eta zaratak eta bibrazioak minimizatu, eta trantsizio energetikoari eta itsas garraioaren deskarbonizazioari lagundu. Proiektuaren arabera, Portuko CO2-emisioak %38,8 jaitsiko dira, eta CO2-emisioak guztira 9.062 tona murriztuko dira.
Gurutzaontzien turismoa
Itsas turismoaren operatibo eta kudeaketa izan da topaketan landutako beste alderdi bat. Europako portuen artean abangoardian dauden mota horretako trafikoetarako instalazio espezifikoak dira ontzi-konpainien erakargarri nagusietako bat. Izan ere, konpainia horiek gero eta gehiago egiten dute Bilboren aldeko apustua, Bilboko, Bizkaiko, Euskadiko eta inguruko erkidegoetako erakargarritasun turistikoak ezagutzeko sarbide gisa. Hala, 2024an, Getxon kokatutako gurutzaontzietarako terminalek 150.000 turista baino gehiago jaso zituzten -horietatik 283 japoniarrak-, 90 gurutzaontzitan. Espero da zifra horiek gainditzea 2025eko denboraldian, non uztailera arte 428 turista nipondar iritsi baitira.
Portuko Agintaritza etengabe ari da lanean kalitateko zerbitzua eskaintzeko bai bidaiariei bai ontzi-konpainiei, pertsonen eta ibilgailuen irisgarritasuna hobetuz, portuko azpiegiturak kaietan porturatzen diren ontzi modernoen beharretara egokituz, eta operatibo eraginkor bat bultzatuz, non une oro lehentasuna ematen baitzaie bidaiarien erosotasunari eta segurtasunari.
Trafikoa Japoniarekin
Japoniako Behe Ganberako ordezkaritzaren bisita bat dator AEBetako administrazioak abiatutako muga-zergen politikak eragindako tentsio komertzialekin, eta, besteak beste, Japoniako eta Euskadiko enpresa- eta logistika-ehunaren arteko loturak estutzea eta bi lurraldeetako enpresentzat merkatu berriak irekitzea du helburu.
2024an, Bilboko Portutik 10.219 tona esportatu ziren Japoniara, batez ere ‘Beste ondasun batzuk’ (3.073 t) eta ‘Beste produktu metalurgiko batzuk’ (2.270 t) partidetatik. Inportazioei dagokienez, aurreko ekitaldian 157.774 tona bildu ziren, batez ere ‘Burdinazko eta altzairuzko produktuak’ (148.540 t) eta ‘Beste ondasun batzuk’ (3.474 t) partidengatik.
